كتير منا حابب يحصل علي إمتيازات وظيفية كتير ولكن ممكن يغفل عن ازاي يقدر يحقق دا فمن جانبنا ك نتعلم.كوم
دايما بنسعي في أننا نساعدك في ده علشان كده احنا هنتكلم النهاردة عن أهمية حصولك علي شهادة دولية في مجالك ومدي تأثيرها عليك في السلك الوظيفي.
– الاعتمادات بتنقسم لنوعين:
1- إعتماد أكاديمي
2- إعتماد مهني
– الاعتماد الاكاديمي هو أنك حاصل علي درجة علمية (بكالوريوس – ماجستير – دكتوراه ) وبيختلف قوته بإختلاف ترتيب الجامعة او المعهد اللي حاصل منه علي الدرجة العلمية وهل الجامعة حاصله علي إعتمادات ولا لا.
– الاعتماد المهني ودا الاهم بالنسبالنا في المقالة واللي هنتكلم عنه بالتفصيل …
مع كثرة عدد الخريجين سواء في الهندسة او غيرها اصبح الحصول علي شهادة دولية قوية في مجالك شئ مهم يساعدك في المنافسة علي الوظائف القوية في سوق العمل وتحقيق نجاحات مع شركات ومنظمات كبيرة.
– في الحقيقة ان الاسباب اللي ممكن تدفعك انك تحصل علي إعتماد دولي كتيرة ومتعددة ولكن هنذكر بعضها:
1- المصداقية
كونك حاصل علي شهادة معينة دا بيثبت انك علي Level معين من المعرفة النظرية والخبرة العملية والمهارات الشخصية ودا بيختلف طبعا من شهادة لأخري.
فعلي سبيل المثال مجال ال IT حوالي 60% من اصحاب العمل بيتأكدوا من قوة الشخص المتقدم للوظيفة من خلال حصوله علي شهادات دولية بجانب دراسته الأكاديمية.
2- زيادة الفرص التوظيفية
زي ما قولنا ان المنافسة في سوق العمل بقت قوية جدا فلازم تكون حد مميز علشان تقدر تحصل علي وظيفة مرموقة ولأن 2% بس من المتقدمين للوظيفة هم اللي بيتم التواصل معاهم لعمل Interview فالأولوية بتكون لحاملي الشهادات الدولية.
شركة Microsoft واحدة من أكبر الشركات العالمية أكتشفت أن 91% من مديري التوظيف بالشركة بيعتبروا الشهادات الدولية جزء اساسي من عملية اختيار الملتحقين بالوظيفة.
3- زياده المرتب الشخصي
في الشركات والمنظمات اللي بتهتم بالشهادات الدولية بيحصل الشخص المعتَمد علي زيادة تصل إلي حوالي 18% علي المرتب السنوي وطبعا ممكن تزيد مع زيادة الشهادات.
4- دائما علي اطلاع بكل ماهو جديد
أغلب المجالات الهندسية في تطور دائم وبشكل سريع وواحد من الاساليب اللي هتساعدك تكون علي اطلاع بالمتغيرات والتطورات اللي بتحصل في مجالك هو تحضيرك للشهادات الدولية.
5- إثبات للإلتزام والبحث عن التطور
كونك حاصل علي شهادة إضافية لتعليمك الأساسي دا معناه انك استقطعت جزء من وقتك علشان تطور من نفسك وتذاكر وتقرأ ودا مبيحصلش في وقت قليل ولكنه بيتطلب استمرارية وسعي كبير فده إثبات انك حد علي قدر كبير من الالتزام.
6- تطوير للمهارات
الشهادات بتحتاج تحضير كبير ليها ودا هيخليك محتاج تزود مهارة ادارة الوقت عندك علشان تقدر توازن بين شغلك وحياتك الاجتماعية وسعيك في الحصول علي شهادة في مجالك.
بالاضافة إلي مهارة ادارة الوقت انت كمان مطالب تقدر تتعامل مع الضغوط والمشاكل اللي هتقابلها سواء لتحضيرك للإمتحان او وقت الامتحان نفسه.
7- تأهيلك لتقديم الاستشارات
تقدر بجانب وظيفتك الاساسية تقدم استشارات في مجالك لأنك مؤهل لده سواء في المعرفة النظرية او الخبرة العملية او المهارات الشخصية.
دي اهم المميزات لحصولك علي اعتماد دولي لكن في مميزات تانية كتير مش هنقدر نحصرها كلها في مقالة واحدة.
– زي ما الاعتماد له مميزات كتير لكنه مش بالسهولة يمكن الحصول عليه لأن دا استثمار كبير في الوقت والفلوس والمجهود وممكن لأي ظرف متقدرش تجتاز الامتحان فوقتها بالإضافة للخسائر المادية ( الاعتمادات مكلفة بشكل كبير ) فأنت كمان نفسيا هتتأثر لكن يكفيك دائما شرف المحاولة وكمل سعي متقفش غير لما تحقق هدفك.
هنذكر بعض الشهادات المشهورة في مجالات هندسية مختلفة لكن مهما حاولنا نحصرها مش هنقدر لانها كتيرة لكن تقدر تبحث عنها في جوجل.
1- إدارة المشروعات ( PMP – CAPM – PBA – PgMP )
2- الصيانة ( CMRP – CMRT – CAMA )
3- سلاسل الامداد واللوجستيات ( CPIM – CSCP – CLTD )
4- التصميم الميكانيكي ( CSWE – CSWE-S ) هنتكلم عنهم بالتفصيل في مقالة قادمة
5- الجودة ( SIX SIGMA – LEAN SIX SIGMA )
6- السيفتي ( OSHA )
7- اساسيات الهندسه ) FE ) بعدها “PE” للتخصص المهني الدقيق
وغيرهم كتير من الشهادات تقدر تدور عليهم بالتفصيل وتشوف محتواهم واي شهادة مناسبة ليك ولطبيعة عملك.
