استمتع بعروض بداية العام علي كل دورات ودبلومات نتعلم المنصة الهندسية الأكبر في الشرق الأوسط
00
يوم
:
00
ساعة
:
00
دقيقة
:
00
ثانية
كيف تستفيد من مؤتمر Solidworks السنوي (3DXW22) – Net3lem

كيف تستفيد من مؤتمر Solidworks السنوي (3DXW22)

ف أول كل سنة وتحديداً ف شهر فبراير، شركة Dassault Systèmes – واللى برنامج SolidWorks هو واحد من برامجها – بتعمل event من أكبر الـevents اللى ف المجال الهندسى ف العالم! الـevent دا هو 3DExperience World (SolidWorks World سابقاً)، والسنادى هتبقى الذكرى الـ23 ليه!

فى 3 نقط أساسية لازم أى حد هيحضر الـevent يخرج بيهم، وهما:

  1. التواصل (Networking)، ودا من خلال الـHive Hangouts والـLive Meetups اللى بيحضرها ناس من كل أنحاء العالم مفيش بينهم حاجة مشتركة غير التخصص اللى بيجمعهم، ودى بتبقى فرصة عظيمة لإننا نخرج بمعارف وخبرات جديدة (هتلاقى list بيهم كلهم هنا).
  2. التعليم (Education)، ودا من خلال الـBreakout Sessions اللى بيقدمها خبراء ف البرنامج، وبتكون ف مواضيع متخصصة (زى الـAnimations مثلا 😉).
  3. الفرص (Opportunities)، ودا من خلال الامتحانات المجانية، المشاركة ف مسابقة Model Mania، عروض الـSponsors، وهكذا.

كل دا هيجيلك لحد عندك ومن غير أى تكلفة (باستثناء فاتورة النت 😅)، ودا علشان 3DXW22 بقى:

  1. Fully-Virtual (بعد ما كان hybrid؛ متاح الحضور online أو السفر والحضور ف أمريكا).
  2. مجانى (بعد ما كان فيه packages مختلفة بأسعار مختلفة، كل واحدة بتفتحلك access على حاجات مختلفة).

3DXW22 Banner

🔴 Sessions

زى ما قولنا قبل كدا، الـsessions مواضيعها مختلفة ومجالاتها متعددة، بس الحاجة المشتركة فيها كلها إنك أكيد هتخرج منها بحصيلة علمية وعملية جبارة. وهنقسّم الـsessions لأربع أنواع:

1️⃣ General Sessions:
عددهم 9، ومتوزعين 3 كل يوم من أيام الـevent؛ واحدة لافتتاح اليوم، واحدة فيها ملخص (Highlights) اليوم، وواحدة لختام اليوم. بيبقى فيهم guests مهمين جدا من علماء لـCEOs وحتى Lead Designers، وكلهم ف شركات مرموقة وليها وزنها زى NASA و General Electric و STARC Systems، وطبعا مننساش Dassault Systèmes نفسها!

2️⃣ Meetup Sessions:
عددهم 33، ودول بيبقوا live كإنك ف Online Meeting بالظبط، ودا بعكس باقى الـBreakout Sessions اللى يتبقى متسجلة. كل session منهم بيبقى ليها موضوع معين وبتبقى موجهة لفئة معينة من الناس (Students – Engineers – Managers – إلخ)، ودى بتبقى فرصة كويسة جدا لإنك تتعرف على ناس شغالة معاك ف المجال وتشاركهم خبراتك وإنجازاتك.

3️⃣ Breakout Sessions:
دول بقى فوق الـ180 session، ومواضيعها بتختلف على أساس حاجتين:
المستوى (Beginner – Intermediate – Power-User)
الموضوع (Design & Engineering – Simulation – Visualization – Management – إلخ)
ورغم إن الـsessions بتبقى مدتها 45 دقيقة بس، إلا إنك معاك كمان 15 دقيقة بعد كل session تقدر تبعت فيها أى أسئلة عندك للـpresenter وهيجاوبك عليها، ودا من خلال الـ3DSwym Q&A Community.

4️⃣ Partner Sessions:
دول بيبقوا sessions من الـpartners والـsponsors بتوع الـevent، وكلهم شركات معروفة زى Dell، Intel، SWOOD، 3Dconnexion، Smap3D، SolidProfessor وغيرهم كتير!
طبعا ممكن تستغرب وتسأل ايه الشئ المشترك بين دول علشان يبقوا partners لحاجة زى 3DXW22، بس لما تشوف محتوى الـsessions بتاعتهم هتلاقيهم كلهم بيقدموا محتوى عن استخدام المنتجات بتاعتهم ف تحسين شغلك على SolidWorks و 3DExperience Works.

🔴 Model Mania

لو ناوى تشارك ف مسابقة Model Mania واللى بتتعمل كل سنة كجزء من 3DX World، ف دلوقتى تقدر تسجل من هنا وتشوف ميعادها وقواعدها. وبشكل عام، المسابقة بتركز على سرعتك ودقتك ف إنك تصمم قطعة وتعمل عليها Simulation بسيط، ودا كله ف أقل من زمن المسابقة واللى هو 20 دقيقة!

🔴 Free Exams

وبما إن ﴿خِتَامُهُ مِسْكٌ﴾، ف حابب أختم بموضوع الكل حرفياً مهتم بيه ومتابعه، والموضوع هو إن أى حد مسجل ف 3DXW22 هيقدر يمتحن لحد 8 امتحانات ببلاش 🔥
طبعاً فى أسئلة كتير هتيجى على بالك، زى
ايه عدد الامتحانات المتاحة؟
هتفضل متاحة ببلاش لحد امتى؟
ايه الامتحانات اللى ممكن نختار منها؟
لازم نعمل حاجة الأول علشان تتفتح ولا لأ؟
وغيرها أسئلة كتير واللى هنجاوب عليها كلها دلوقتى
أول حاجة، انسى تماماً نظام السنة اللى فاتت وابدأ معايا صفحة جديدة، ودا علشان الشئ الوحيد المشترك بين نظام السنة اللى فاتت ودلوقتى هو وجود امتحانات ببلاش وبس، إنما باقى التفاصيل كلها اتغيرت.
نيجى بقى للامتحانات نفسها: بمجرد ما تسجل ف الـevent، كدا هيبقى معاك 5 أيام هتتفتح فيهم الامتحانات ببلاش، هتبدأ من يوم 14 فبراير الساعة 7 الصبح بتوقيت مصر (EET) ولحد 19 فبراير الساعة 6:59، وخلال الـ5 أيام دول هيبقى ليك محاولتين اتنين بس لامتحانات SolidWorks، و 6 محاولات لامتحانات 3DExperience Works.
مش كل الامتحانات هتبقى متاحة لإنك تختار منها؛ اللى متاح هو 15 امتحان لـSW و 8 امتحانات للـ3DX Works، والامتحانات دى موجودة ف الصورة دى ⬇
3DXW22 Free Exams
ف دلوقتى كل اللى عليك بعد ما تسجل هو إنك تجهز نفسك وتشوف عايز تمتحن ف ايه، ويوم 14 افتح برنامج Tangix TesterPro Client واعمل log in بالـaccount بتاعك واللى لازم يكون بنفس الـemail اللى انتا مسجل بيه ف الـevent*، بعدها هتلاقى الامتحانات اللى ف الصورة اللى فوق كلها موجودة ومتاحة من غير ما تحتاج تدخل voucher ولا حاجة، وساعتها كل اللى عليك إنك تعمله هو إنك تتوكل على الله وتبدأ الامتحان 😉

*لو أصلا عندك account على الـtester بس بـemail مختلف عن اللى انتا مسجل بيه ف الـevent، كل اللى عليك هو إنك تبعت email للـSupport Team وتطلب منهم إنهم يغيروا الـemail المرتبط بالـaccount، ودا الـemail بتاعهم:
3dxw22help@nthdegree.com

0
    سلة التسوق
    سلة التسوق فارغةالرجوع للرئيسية